تعريف خاص بالمواد المتعلقة بكلية تجارة انجلش جامعة اسيوط.
النهارده معادنا مع دفعه تجاره انجلش الفرقه الثانيه ، بعنوان مواد كلية تجارة انجلش جامعة اسيوط الفرقة الثانية.
هحاول ابسطلكم الدنيا فمواد الترم الاول لحين لقاءنا فموضوع تانى يخص الترم التانى.
يلا بينا ....
اول ماده وهى شركات:-
ودى مادة المحاسبة لسنه تانيه تجارة انجلش واسمها الجديد وهو شركات .
الماده كالعادة كويسة وسهلة، هتدرس فيها شركات الاشخاص والطريقه اللى ممكن بيها تضيف شريك او تطلع شريك، وتحسب النسبه بتاعته اللى عايز يدخل او هيطلع بيها.
فالمادة لحد هنا كويسه لكن اللى ممكن يعطلك شابتر التصفيه الخاص بالشركه.
وهو مش صعب خالص لا هو محتاج تركيز في كل خطوه جامد والمادة كلها مع التركيز والمذاكره والحل الكتير بيتجاب.
ممكن لو عايز تاخد فكره تشوف مصطفي سمير ع اليوتيوب partnership.
وتانى ماده وهى تسويق :-
وبندلعها بالماركتنج ودى خاصه بدكتور/ حسنى حماد ودا من افضل الدكاتره عندنا وجربناه فسنه اولى .
والدكتور من الافضل انك تحضرله لان دى ماده مش هتاخد فيها كورس.
لانها زى ماقولت مادة نظرى مليانة حشو فانت ممكن تقرا الشباتر مع نفسك وتفهمها .
لانها مش محتاجة شرح اوى ويفضل انك تجيب ورق الكورسات او الكتاب مع محاضرات د/حسنى ودا يكفى.
ولو حد من صحابك هيحضرله خد منه اللى كتبه ورا الدكتور .
وتالت ماده وهى لغه ثانيه:-
لغه المحاسبه دي بقي اللى مش كويسة نهائى كان بيدينا د/محمد السمان .
الامتحان بتاعه مكنش سهل.
والماده فيها قوانين، انت ممكن تبدا في نص الترم كورسات عادى لانها عدد شباتر قليله .
بس فيها قوانين كتير ونصيحتى خلي بالك من قوانين دى لانها فعلا جعلت من السهل صعب .
ورابع ماده وهى نقود وبنوك :-
ودى ماده دكتور/ طلب بعد وفاة دكتور/ الطوخى.
ودى ماده نظري طويه شويه بس حلوه بتتكلم عن البنوك وطرق انشائها، وبتتكلم عن البنك المركزي ودوره واهدافه.
ووصف النقود قديما وحديثا والسحب والايداع والمقايضه وسبب الغاء المقايضه وكده.
دي ممكن تقرا فيها لان المعظم ال فيها نظري ، والامتحان جه فيها كويس.
وخامس ماده وهى تأمين:-
ودى مادة دكتور/ صفيه والماده عباره عن 9 شباتر ( 7 منهم نظري محتاج تفهمه مش تحفظه يعني سهل وحلو و2 منهم عملي ).
الماده بتبداها في نص الترم مش من بدايته .
الماده انت معروف هتعمل فيها ايه وهتاخد كورس عند مين .
وسادس ماده وهى تطبيقات حاسب :-
او بنسميها برضو الكمبيوتر ودى مادة دكتور /علي الطيب دكتور في قسم رياضه والمادة سهلة مفيهاش مشاكل.
الماده عباره عن جزئيبن اول جزء وهو الأكبر وبيتكلم عن الرياضه اللي اخدناها في اولي الترم الثاني ال هي الفائده وانواعها بس بنطبقها ع جهاز الكمبيوتر.
وثاني جزء عباره عن مجموعه من البرامج الرياضيه ... زي الاكسل ...
الماده فيها امتحان عملي ع جهاز الكمبيوتر عليه 4 درجات، وامتحان اخر الترم عليه 16 درجه.
الماده مش كبيره .... وماده امتياز باذن الله وانت عارف برضو هتعمل فيها ايه.
وسابع ماده وهى قانون تجارى:-
القانون دا بقا ال لازم كنت تمسكه في الاجازه عشان فيه رغي ما بعده رغي.
القانون فيه جزئين جزء لشركات الاشخاص، وجزء لشركات الاستثمار.
بتدرس فيهم مين ليه احقيه انه يمسك الشركه وسعر السهم لازم يكون كام وميقلش عن كام طبقا لسنه كذا .
ولازم التواريخ وتركز في كل كلمه كل كلمه حرفيا عشان الدكتور دا دماغه فحتة تانية.
لان الحكايات ال بيحكيها في المحاضره ابقي خليها في دماغك عشان جابلنا حكايتين منهم علي هيئه قضيتين فالامتحان ، وانت حل بقي علي اساس الفهم بتاعك .
القانون حفظ اه بس خلي بالك في فهم برضو عشان بيلعب علي كده.
إرسال تعليق