اليوم سنتعرف على مواد تجاره انجلش جامعه اسيوط .
ازيكم يا سنه اولى عاملين اي .
بالنسبة لمواد كليه تجاره انجلش جامعه اسيوط .
انا شايف ناس كتير تايهه و مش عارفه تذاكر ازاي و بما اني كنت زيكم برضو متشتت.
ف انا هقولكم ع الدنيا المفروض تمشي ازاي مع المواد خاصة فى جامعه اسيوط .
بحكم اني بقالي اربع سنين ف الكليه و انا الحمد لله جايب امتياز بس علشان فهمت الدكاترة مش اكتر.
اول مادة من مواد كليه تجاره انجلش وهي السياسه .
 |
| ماده السياسه |
وهى من اول المواد التى تدرس فى كليه تجاره انجلش جامعه اسيوط .
طبعا ع حسب الاغلبيه ف دي البعبع و ماده صعبه و كلام كتير عليها ...
بس انا عاوز افهمك حاجة المشكله مش هتبقى ف المادة ع قد ما هتبقى ف الدكتور و فيكم انتو شخصيا.
دكتور احمد الشورى هو اللي بيديكم المادة و حقيقي والله برضو يمكن دكتور احمد الشورى شرحه كويس جدا.
وده لانه فاهم دماغ الشاب كويس و فاهم دماغك و شرحه عظيم جدا بس عاوز انبه ع حاجة.
وهي كلمه واحده لو دكتور احمد الشورى اتضايق منكم ف كدا بالسلامه لانه زعله وحش حقيقي ف بلاش استهتار و تضيعوا الشرح بتاع الدكتور كدا و تضيعوا عليكم المادة .
تاني حاجة واهم حاجه ان الدكتور بيجيب امثلة من المحاضرة ف بالتالي لازم لازم لازم تحضروا .
ف نصيحة مني بلاش حد فيكم يضايق اي حد من الدكاتره و ماده السياسه بتعتمد ع الحفظ ع فكره و الى حد ما فهم.
وبلاش تقول كله انجلش انجلش علشان هتيجي بعدين و تاخد ع الوضع و هتجيب امتيازات و افتكر كلامي .
تاني ماده من مواد كليه التجاره انجلش وهي مادة الماث.
 |
| ماده الرياضه. |
و دي تانى مادة من مواد كليه تجاره انجلش جامعه اسيوط، وهى مادة امتياز و مادة سهلة جدا جدا جدا و كلها معادلات اصلا .
ومفيهاش صعوبه حتى لو كنت بتكره الرياضه ف هتجيب فيها امتياز .
تالت مادة من مواد جامعه اسيوط وهي الاكونتنج.
 |
| ماده المحاسبه . |
و هقف عندها شويه معلش و هقول نصيحة لوجه الله انك تحاول تفهم المحاسبه كويس جدا .
لانها هتترتب معاك ف السنين الاربعة كلها ف علشان متتعبش افهم المحاسبه و هي سهلة جدا حرفيا .
تاني حاجة ان دكتور طه معروف عنه ان الكل بيجيب امتياز و الامتحان بتاع كل سنة و هو هو ف لو جبت جيد جدا ف انت كدا بتغلط فيه .
رابع مادة فبرنامج الإنجلش جامعه اسيوط وهي اللغة.
 |
| ماده لغه محاسبه |
 |
| ماده لغه اداره |
و دي متقسمة ع لغة محاسبه و لغة ادارة و الاتنين سهلين و لغه الإدارة معتمده ع فهمك للمحاسبه ف دي مادة امتياز و متضيعهاش .
خامس مادة من مواد شعبة انجلش وهي القانون .
 |
| ماده القانون |
دكتور عبد الغفار بيحب الحضور و من الاخر لازم كل دكتور تحضرله علشان ميحطش عليكم ....
و نصيحتي للقانون لوووو انت هتقدر تلمها ف ليالي الامتحانات سيبها للاخر لان انا و اغلب دفعتي عملت كدا.
والله لو هتقدر تذاكر كل المواد ع طول ف توكل ع الله بس ع الاغلب هتكره الكليه ب اللي فيها.
لانها مش ب المذاكره والله ممكن تذاكر اقل من صاحبك و تجيب اعلى منه .
سادس مادة من مواد الكليه وهي الإدارة .
 |
| ماده الاداره |
و دي مادة ممتعه جدا جدا حرفيا و اوعي تحفظ لانها محتاجة فهم.
و هي سهلة جدا و بسيطة و دكتورة نسمه بلاش تزعلوها و هي امتحاناتها حلوة برضو .
ف انت الادارة خد المحاضرة من هنا و ذاكرها ب فهم و خلصت ع كدا .
سابع ماده واخر مادة و هي الاقتصاد.
 |
| ماده الاقتصاء |
الاقتصاد ناس كتير بتشتكي منه بس حقيقي لو فهمت الدنيا هتجيب فيه امتيازات.
وانا خلال الاربع سنين جايب فيهم امتياز بس علشان فهمت المادة مش صعبة و بتتشال زي مانتو فاهمين .
و هقولك ع كذا حاجة كدا اسمعهم من واحد خد مع الدكتور طلب اكتر من مادة و جاب فيهم امتياز الحمد لله.
اول حاجة اوعى تحفظ و من الاخر لو حفظت هتشيل سكة و دوغري كدا.
علشان دي والله لو فهمتها هتبقى اسهل مادة حرفيا و تاني حاجة ان الدكتور طلب بيحب الكيرفات برضو و الكيرفات مبنيه ع الفهم .
وبيحب الكتابه الكتير ف الامتحان هتقولي الانجلش صعب و بتاع.
احب اقولك اني كنت بكره حاجة اسمها انجلش بس حرفيا لما فهمت المادة كويس جدا بقت سهلة بشكل غبي والله .
و بقيت بكتب فى السؤال الواحد اكتر من تلت صفحات و عادي فانت شيل الفكرة دي من دماغك خالص.
وافهم المادة و هتلاقيها سهلة جدا جدا و افتكر كلامي كويس .
كدا انا خلصت كلامي بس نصيحة ل وجه الله كدا بلاش تتعب نفسك و تقول المواد كلها صعبة و بتاع و هاخد فيها كورسات....
انت هتلاقي اي حد بيقولك خد كورس و اخلص ... انت لو المادة فعلا صعبة عليك اوي و مش فاهم خد كورس.
لان سهل اي حد يقولك خد كورس و سنه اولى سهلة جدا و اسهل مواد بس الفكرة انك اول سنه و مش فاهم الدكاترة و المواد.
ربنا معاكم ان شاء الله ♡.
إرسال تعليق